استحصالی نظام نے جمہوریت کے لبادے میں عوام کو زندہ درگو کردیا،رمضان مغل

فیصل آباد (سٹاف رپورٹر) استحصالی نظام نے جمہوریت کے لبادے میں عوام کوزندہ درگور کردیاہے۔ اس نظام کی موجودگی میں عوام کی بہتری کی توقع وقت کاضیاع ہے۔پاکستان فلاح پارٹی کے نومنتخب چیئرمین رمضان مغل کی فیصل آباد کے پارٹی ممبران سے ملاقات میں گفتگو، گذشتہ روز مرکزی وصوبائی انتخابات کے بعد سندھ روانگی سے پہلے پارٹی ممبران سے ملاقات کی، اس موقع پر انہوں نے پارٹی ممبران سے بات چیت کرتے ہوئے کہا کہ معاشرتی طبقاتی تقسیم کے خلاف متحد ہو کر عملی جدوجہد کرناہوگی، 25کروڑعوام کی آبادی کے وسائل چند سو گھرانے ہڑپ کرکے عیاشی کررہے ہیں جبکہ ملک کی اکثریت عوام مایوسی کے عالم میں زندگی کے دن پورے کررہے ہیں، پاکستان میں جمہوریت کے نام پر عوام کا بدترین استحصال ہو رہا ہے جسے روکنا ضروری ہو چکا ہے، بصورت ملک وقوم میں افراتفری تباہی لائے گی، ابھی بھی وقت ہے کہ ملک کے صاحبان اختیار واقتدار اپنی ذاتی ترجیحات کی بجائے عوامی مسائل کے حل کیلئے سنجیدہ ہوں، پاکستان فلاح پارٹی جلد ملک گیر مہم چلائے گی، عوام کو اپنے حقوق کیلئے میدان عمل میں اپنا کردار ادا کرنے پرآمادہ اورفرسودہ طبقاتی نظام کے خلاف تحرک پیدا کریگی، نومنتخب چیئرمین پاکستان فلاح پارٹی رمضان مغل نے مزیدکہاکہ گذشتہ دنوں پاکستان فلاح پارٹی کے مرکزی وصوبائی انتخابات مکمل ہوچکے ہیں جلدمرکزی وصوبائی سطح پر باڈیز مکمل کرکے عوامی مسائل سے چشم پوشی کرنے والے استحصالی ٹولے کیخلاف لائحہ عمل کا اعلان کیا جائے گا، اس موقع پر پارٹی ممبران محمد رفیق لودھی، محمد طارق گجر، سیدآفتاب عظیم بخاری، ضیا اللہ نیازی، پروفیسر رحمت اللہ سیالوی، سید نعیم بخاری، شہزاد احمد سلطانی، ملک جاوید اقبال ویگر موجود تھے۔