MDواسا کی نادہندگان کیخلاف کریک ڈائون کی ہدایت

فیصل آباد (سٹاف رپورٹر) مینیجنگ ڈائریکٹر واسا سہیل قادر چیمہ نے نادہندگان کے خلاف کریک ڈائون کرنے کی ہدایت کر دی ہے جبکہ یہ بھی واضح کیا کہ ڈیفالٹرز کے ذمہ واجب الادا رقوم کی وصولی پر خصوصی توجہ مرکوز رکھی جائے۔ یہ ہدایت انہوں نے ریونیو ریکوری جائزہ اجلاس کی صدارت کرتے ہوئے جاری کی۔ اس موقع پر ڈپٹی مینجنگ ڈائریکٹر ایڈمن شعیب رشید، ڈائریکٹر فنانس شہریار حسن، ڈائریکٹرز ریونیو محمد اقبال ملک، عمر افتخار خاں، ڈپٹی ڈائریکٹرز ظفراقبال قادری، فرحان علی عبدالرئوف بٹ، حافظ معین احمد، شاہد پاشا، عبدالوہاب و دیگر بھی موجود تھے۔ ایم ڈی واسا سہیل قادر چیمہ نے مزید کہا کہ دونوں ڈائریکٹوریٹس اپنی ریکوری میں مزید اضافہ کریں جبکہ ایسے صارفین جن کے ذمہ واجبات الادا رقوم ہیں ان سے بقایا جات کی رقوم کی وصولی پر فوکس کیا جائے۔ انہوں نے کہا کہ ریونیو افسران روزانہ کی بنیاد پر اپنے فیلڈ وزٹ کو یقینی بنائیں تاکہ فیلڈ میں موجود سٹاف کی مانیٹرنگ بھی کی جا سکے، اس کے ساتھ ساتھ انہوں نے واجبات اور ماہانہ بلز جمع کروانے والے صارفین کی تعداد میں اضافہ کرنے کی بھی تاکید کی۔ ایم ڈی واسا سہیل قادر چیمہ نے واضح کیا کہ ریونیو ریکوری میں اضافہ سے ہی واسا فیصل آباد کی فنانشنل پوزیشن مستحکم ہو گی جس سے صارفین کو فراہمی و نکاسی آب کی بہترین سہولیات مہیا کرنا ممکن ہو گا ۔