لاہور (شوبز نیوز) ٹی وی اور فلم کے سینئر اداکار راشد محمود نے مہنگائی اور بے روزگاری پر تشویش کا اظہار کرتے ہوئے حکومت سے عوام کی مشکلات کا ازالہ کرنے کی اپیل کی ہے۔ایک ویڈیو بیان میں راشد محمود کا کہنا ہے کہ میں گزشتہ 5ماہ سے جوڑوں کے درد میں مبتلا ہوں، جبکہ میں پہلے ہی دل کا مریض ہوں، 4 ہارٹ اٹیک ہو چکے ہیں اور کئی ماہ سے کام بھی نہیں ملا۔اداکار نے کہا ہے کہ ہم نے ٹیلی ویژن کی صنعت بنائی، برصغیر کو ڈرامہ سکھایا اور آج ہم ہی بے روزگار ہیں، ہم اپنی اقدار سے جڑے ہوئے ہیں لیکن اس وقت شدید تکلیف میں ہیں اور کام سے محروم ہیں۔راشد محمود نے کہا ہے کہ مجھے صرف اداکاری کا کام آتا ہے، مجھے صدارتی ایوارڈ بھی مل چکا ہے اور عوام نے مجھے اسٹار بنایا۔
