FBRکے افسران کو بنیادی تنخواہوں سے دوگنا ریوارڈ دیا جائیگا

اسلام آباد (بیوروچیف) وفاقی حکومت نے ان لینڈ ریونیو ریوارڈ رولز 2021میں ترمیم کی منظوری دے دی ہے، جسکے تحت ایف بی آر کے افسران کو بنیادی تنخواہوں سے دو گنا تک ریوارڈ دیا جا سکے گا۔ اس ترمیم کے بعد افسران کو دئیے جانیوالے ریوارڈ کی زیادہ سے زیادہ حد بھی واضح طور پر مقرر کر دی گئی ہے۔نئے قواعد کے مطابق شاندار خدمات پر ہر ملازم کو ایک مالی سال میں زیادہ سے زیادہ 24تنخواہوں تک ریوارڈ دیا جا سکے گا۔ یہ ریوارڈ انکم ٹیکس، سیلز ٹیکس، فیڈرل ایکسا ئز اور دیگر متعلقہ شعبوں میں کام کرنیوالے افسران پر لاگو ہوگا۔یہ ترمیم انکم ٹیکس آرڈیننس 2001 اور سیلز ٹیکس ایکٹ 1990کے تحت کی گئی ہے۔ ایف بی آر کا کہنا ہے کہ اس سے قبل ملازمین کو انعامات دینے کے حوالے سے کوئی حد مقرر نہیں تھی، جبکہ اب بڑے ٹیکس کیسز کی کامیاب کارروائی، ٹیکس چوری کی نشاندہی اور ریکوری میں نمایاں اضافہ پر افسران کو انعامات دئیے جائیں گے۔