صائم ایوب نے برائن لارا کا31سالہ پرانا ریکارڈ توڑ دیا

لاہور (سپورٹس نیوز) جنوبی افریقا کے خلاف پہلے ون ڈے میں شاندار سنچری اسکور کرنے والے پاکستان کے نوجوان بیٹر صائم ایوب نے ویسٹ انڈیز کرکٹ ٹیم کے سابق کپتان برائن لارا کا 31 سال پرانا ایک منفرد ریکارڈ توڑ دیا۔ 3 ون ڈے میچز کی سیریز کا پہلا میچ جنوبی افریقا کے شہر پارل میں کھیلا گیا جس میں پاکستان نے میزبان ٹیم کو 3 وکٹوں سے شکست دی۔ جنوبی افریقا کے 240 رنز کے ہدف کے تعاقب میں پاکستانی اوپنر صائم ایوب نے شاندار سنچری اسکور کی اور 109 رنز کی اننگز کھیلی۔22 سالہ صائم ایوب نے جنوبی افریقا کے خلاف سنچری اسکور کرنے کے بعد برائن لارا کا 31 سال قبل بنایا گیا ریکارڈ توڑ دیا۔صائم ایوب ون ڈے کرکٹ میں جنوبی افریقا کے خلاف ہدف کے تعاقب میں سنچری اسکور کرنے والے دنیا کے کم عمر ترین بیٹر بن گئے ہیں۔اس سے قبل برائن لارا نے فروری 1993 میں 23 سال اور 297 دن کی عمر میں بلوم فائونٹین میں جنوبی افریقہ کیخلاف ون ڈے میں ہدف کے تعاقب میں سنچری سکور کی تھی۔ واضح رہے کہ پاکستان کو جنوبی افریقا کے خلاف3ون ڈے میچز کی سیریز میں ایک صفرکی برتری حاصل ہوگئی ہے۔ سیریز کا دوسرا ون ڈے کل بروز جمعرات کھیلا جائے گا۔