وہ جگہ جہاں سمارٹ فون چارج نہیں کرنا چاہیے

کیلیفورنیا (مانیٹرنگ ڈیسک) ہم میں سے بیشتر افراد ایسا کرتے ہیں، گھر آنے کے بعد بستر پر جانے سے قبل اسمارٹ فون کو سرہانے رکھ کر چارج کرنے لگتے ہیںکچھ افراد تو فون کو چارجنگ پر لگا کر سو بھی جاتے ہیں۔رات بھر فون کو چارج کرنا نقصان دہ ہے یا نہیں، یہ کافی لمبی بحث ہے، مگر یہ واضح ہے کہ طویل المعیاد بنیادوں پر ایسا کرنا ضرور بیٹری لائف کو نقصان پہنچاتا ہے۔اسی طرح کچھ افراد فون پر ویڈیو دیکھتے ہوئے سو جاتے ہیں مگر ماہرین کے مطابق سونے کے کمرے میں فون کو چارج کرنے سے گریز کرنا چاہیے۔اسمارٹ فونز میں حرارت کو کنٹرول میں رکھنے کے لیے کافی ٹیکنالوجیز کا استعمال کیا جاتا ہے مگر فون کو تکیے کے نیچے رکھ کر سونے سے حرارت کا اخراج نہیں ہوتا۔اگر آپ فون کو چارج پر لگا کر سوگئے ہیں تو حرارت کا اخراج بڑھتا ہے اور فون سے آگ لگنے کا خطرہ بھی بڑھتا ہے۔یہی وجہ ہے کہ ماہرین کی جانب سے فون کو ایسی جگہ پر چارج کرنے کا مشورہ دیا جاتا ہے جہاں سے حرارت کی نکاسی صحیح طریقے سے ہوسکے، جیسے سپاٹ کانٹر یا میز، جہاں سرد ہوا مسلسل ڈیوائس تک پہنچتی رہتی ہے۔سائنسدانوں کے مطابق فون کو سونے کے کمرے میں قریب رکھنے سے متعدد منفی مسائل کا سامنا ہوسکتا ہے۔آگ لگنے کے خدشے سے ہٹ کر فون سے نیند کا معیار متاثر ہوسکتا ہے۔اس کی وجہ یہ ہے کہ فون میں موجود ایپس، گیمز اور دوستوں کے میسجز سے دھیان بھٹکتا ہے اور دماغ تعین نہیں کرپاتا کہ آپ سونا چاہتے ہیں یا نہیں، جس سے نیند کا مجموعی معیار گھٹ جاتا ہے۔جب فون آپ کے سرہانے پر ہوتا ہے تو سونے سے قبل اس کے استعمال سے گریز کرنا بہت مشکل ہوتا ہے۔ایک تحقیق میں دریافت کیا گیا کہ سونے سے کچھ دیر قبل اسمارٹ فون سے خارج ہونے والی نیلی روشنی کی زد میں رہنے سے نیند متاثر ہوتی ہے۔ماہرین کی جانب سے مشورہ دیا جاتا ہے کہ سونے سے کچھ دیر قبل اسکرینوں کا استعمال بالکل نہ کیا جائے۔