آسٹریلیا کے خلاف آخری ٹی ٹوئنٹی میچ میں تاریخ رقم

لاہور (سپورٹس نیوز) پاکستان نے آسٹریلیا کو ٹی ٹوئنٹی سیریز میں وائٹ واش کر دیا۔آخری میچ میں کئی ریکارڈ بھی بن گئے، پاکستانی ٹیم وہ پہلی ٹیم بن گئی جس نے آسٹریلیا کو ٹی ٹوئنٹی انٹرنیشنل میں تین بار سو رنز سے کم پر آئوٹ کیا، اس کے علاوہ پاکستان نے تین میچوں کی سیریز میں دوسری مرتبہ کلین سویپ کرنے کا اعزاز بھی اپنے نام کیا۔قومی ٹیم نے آسٹریلیا کے خلاف ٹیٹوئنٹی میں اپنی تاریخ کا سب سے بڑا اسکور 207 رنز بھی بنا دیا، جس کے جواب میں آسٹریلیا کی ٹیم 96 رنز پر ہی ہمت ہار گئی۔اس طرح پاکستان نے آسٹریلیا کو 111 رنز سے تاریخ کی بدترین شکست سے دوچار کیا، بالنگ میں محمد نواز نے تاریخ رقم کی، انہوں نے 5 وکٹیں حاصل کیں اور آسٹریلیا کے خلاف ٹی ٹوئنٹی انٹرنیشنل میں پانچ وکٹیں حاصل کرنے والے پہلے پاکستانی بالر کا اعزاز حاصل کر لیا۔محمد نواز ٹی ٹوئنٹی انٹرنیشنل میں مجموعی طور پر پانچ وکٹیں حاصل کرنے والے دوسرے پاکستانی بالر بھی بن گئے ہیں، ان سے قبل یہ ریکارڈ عمر گل کے پاس تھا۔شاہین آفریدی نے بھی آخری میچ میں ایک اعزاز حاصل کیا انہوں نے اپنے پہلے ہی اوور میں وکٹ حاصل کرکے پہلے اوور میں 25 وکٹیں حاصل کرنے کا ریکارڈ بنایا۔بابراعظم نے اس میچ میں نصف سنچری بنا کر ٹی ٹوئنٹی انٹرنیشنل میں سب سے زیادہ نصف سنچریوں کا ویرات کوہلی کا ریکارڈ توڑ دیا، بابراعظم نے 39 نصف سنچریاں بنائی ہیں۔