غزہ(مانیٹرنگ ڈیسک) غزہ کی پٹی میں اسرائیلی فضائی حملوں کے نتیجے میں 9سالہ بچے سمیت 5فلسطینی شہید ہو گئے۔حکام کے مطابق غزہ شہر کے علاقے رمال میں ڈرون نے گاڑی پر دو میزائل فائر کئے جس کے نتیجے میں 4 افراد شہید اور 6 زخمی ہو گئے، جنوبی غزہ کے علاقے خان یونس کے مشرق میں ایک الگ واقعے میں نو سالہ عدیل اس وقت شہید ہو گیا جب ڈرون حملے اور توپ خانے کی گولہ باری ساتھ ساتھ جاری تھی۔اسرائیلی فوج کا کہنا ہے کہ علاقے میں مشتبہ شخص فوجی دستوں کی جانب بڑھا اور فوری خطرہ پیدا کیا جس پر کارروائی کی گئی تاہم اس دعوے کے حق میں کوئی ثبوت پیش نہیں کیا گیا۔ناصر ہسپتال کے باہر جمع بچے کے اہل خانہ کا کہنا تھا کہ وہ کھانا پکانے کے لئے آگ جلانے کی غرض سے گتے کے ٹکڑے اکٹھے کر رہا تھا، رپورٹ کے مطابق اکتوبر 2025 میں جنگ بندی کے باوجود غزہ پر حملے جاری ہیں۔7 اکتوبر 2023 سے جاری جنگ میں اب تک 72 ہزار 594 افراد شہید اور ایک لاکھ 72 ہزار 404 زخمی ہو چکے ہیں۔
