اسلام آباد (بیوروچیف) وفاقی حکومت نے بجلی تقسیم کار کمپنیوں کی نجکاری کے لیے سرمایہ کاروں سے درخواستیں طلب کرلیں۔ نجکاری کمیشن کی دستاویز کے مطابق حکومت نے فیسکو، گیپکو اور آئیسکو میں 51سے 100فیصد حصص فروخت کرنے کا فیصلہ کرلیا، نجکاری کے تحت نجی سرمایہ کاروں کو کمپنیوں کا انتظامی کنٹرول بھی دیا جائے گا۔ فیسکو کیلئے اظہار دلچسپی جمع کرانے کی آخری تاریخ 7جولائی 2026مقرر کی گئی ہے، گیپکو کیلئے سرمایہ کار6اگست 2026تک درخواستیں جمع کرا سکیں گے، آئیسکو کی نجکاری کیلئے اظہار دلچسپی جمع کرانے کی آخری تاریخ 7 ستمبر 2026مقرر کی گئی۔ ہر کمپنی کیلئے درخو ا ست کے ساتھ 14 لاکھ روپے کی ناقابل واپسی فیس لازمی قرار دی گئی، نجکاری عمل سے متعلق آن لائن بریفنگ سیشن 3 جون 2026 کو زوم پر ہو گا۔فیسکو وسطی پنجاب میں 57 لاکھ صارفین کو بجلی فراہم کرتی ہے، گیپکو گوجرانوالہ اور سیالکوٹ سمیت کئی اضلاع میں خدمات فراہم کرتی ہے، آئیسکو اسلام آباد، راولپنڈی اور آزاد کشمیر کے 41 لاکھ صارفین کو بجلی فراہم کرتی ہے۔ حکومت کا موقف ہے کہ نجکاری سے سرمایہ کاری بڑھے گی اور گردشی قرضوں میں کمی آئے گی جبکہ ماہرین کے مطابق نجکاری میں علاقائی اور عالمی سرمایہ کار دلچسپی لے سکتے ہیں، توانائی شعبے میں نقصانات اور بڑھتے قرضے نجکاری فیصلے کی بڑی وجہ ہیں۔
