پی ٹی آئی کی قیادت میں اختلافات شدت اختیار کرگئے

اسلام آباد (بیوروچیف) پی ٹی آئی کی سیاسی و ٹیکنوکریٹ قیادت میں اختلافات شدت اختیار کر گئے۔ سیاسی بیک گراؤنڈ رکھنے والے متعدد سیاسی رہنماء سیکرٹری جنرل سلمان اکرم راجا کے خلاف متحرک ہوگئے۔ سینئر رہنماؤں نے پارٹی پر مسلط ٹیکنوکریٹ گروپ سے جان چھڑانے کیلئے علیمہ خان سے مدد مانگ لی۔پی ٹی آئی ذرائع کے مطابق سینئر رہنماؤں نے علیمہ خان سے درخواست کی ہے کہ بانی سے ملاقات میں ہماری تجویز کی منظوری حاصل کریں۔ سیاسی قیادت ریاست سے ٹکراؤ کی مخالف اور مذاکرات کی حامی جبکہ وکلا ٹاکرے اور مزید دباؤ بڑھانے کی حکمت عملی پر مصر ہیں۔پارٹی ذرائع کے مطابق وکلا دھڑا اسمبلیوں سے استعفوں کے آپشن پر غور کا حامی ہے جبکہ سیاسی رہنماؤں نے پارلیمانی کردار محدود کرنے کی کسی بھی کوشش کی سخت مخالفت کی ہے۔ سینئر سیاسی رہنماؤں نے وکلاء گروپ کو پارٹی بند گلی تک پہنچانے کا ذمہ دار قرار دے دیا۔ سیاسی رہنماء پارٹی پر مسلط وکلا کے غیرسیاسی فیصلوں سے تنگ آ چکے ہیں ، اپوزیشن لیڈر کیلئے پی ٹی آئی سے باہر سے نامزدگیاں بھی وجہ تنازع ہیں۔ ذرائع کے مطابق سیاسی کمیٹی کے فیصلے مسلسل نظرانداز کئے جانے پر بھی سیاسی رہنماء برہم ہیں۔