تعلیم،توانائی،خوراک کے شعبوں کیلئے66ارب کے فنڈز منظور

اسلام آباد (بیوروچیف) کابینہ کی اقتصادی رابطہ کمیٹی(ای سی سی)نے خوراک، توانائی، صحت اور تعلیم کے شعبوں کیلئے 66ارب روپے کے فنڈز کی منظوری دے دی۔کابینہ کی اقتصادی رابطہ کمیٹی کا اجلاس وفاقی وزیر خزانہ کی زیرصدارت ہوا جس میں فیصلہ کیا گیا کہ پاسکو کے 5لاکھ میٹرک ٹن ذخائر نیلام کیے جائیں گے تاکہ اسٹوریج اخراجات میں کمی آئے اور گندم کی قیمتوں میں استحکام رہے۔اجلاس میں حکومت پنجاب کو آٹے کی دستیابی اور قیمتوں کے استحکام کیلئے 3لاکھ میٹرک ٹن پاسکو گندم فراہم کرنے کی منظوری بھی دی گئی۔ای سی سی نے پاکستان پوسٹ آفس کے ذمے یوٹیلیٹی کمپنیوں کے واجبات کی ادائیگی کیلئے 10ارب 98کروڑ روپے کی تکنیکی ضمنی گرانٹ منظور کرلی۔ بچوں کو حفاظتی ٹیکوں کی فراہمی یقینی بنانے کیلئے وفاقی ڈائریکٹوریٹ آف امیونائزیشن کو 29ارب 66کروڑ 30لاکھ روپے کی تکنیکی ضمنی گرانٹ بھی منظور کی گئی۔ای سی سی نے درآمدی یوریا پر سبسڈی وفاق اور صوبوں کے درمیان ففٹی ففٹی کے تناسب سے تقسیم کرنے کا فیصلہ کیا اور اس مقصد کیلئے 23ارب 42کروڑ روپے کی منظوری دی گئی جن میں سے 15ارب روپے وفاقی حکومت جاری کرے گی۔وزارت ہائوسنگ کو ترقیاتی منصوبوں کیلئے ایک ارب 90کروڑ روپے اور کیڈٹ کالج حسن ابدال کیلئے 15کروڑ روپے کی گرانٹ منظور کی گئی۔اجلاس میں فیڈرل بورڈ آف ریونیو کی جانب سے ضبط کیے گئے سولر پینلز گلگت بلتستان حکومت کو فراہم کرنے کی منظوری بھی دی گئی۔