لاہور( بیورو چیف)کارپوریٹ سیکٹر کی جانب سے بسنت کے تہوار کو بھرپور طریقے سے منانے کیلئے پوش علاقوں میں انتہائی مہنگے کرایوں پر بلند و بالا عمارتوں کی بکنگ کر لی گئی ، ملک بھر سے مہمانوں کو مدعو کرنے کیلئے دعوت نامے ارسا ل کئے جارہے ہیں ، غیر ملکی مہمان بھی بسنت کا تہوار منانے کیلئے منعقد کی جانیوالی تقریبات میں شر یک ہوں گے ۔ ذرائع کے مطابق ملک کی مختلف شعبو ں سے وابستہ نامور کمپنیوں سمیت ملٹی نیشنل کمپنیوں کی جانب سے بسنت کے تہوار کو منانے کیلئے گزشتہ ایک ماہ سے تیاریاں جاری ہیں ۔ اس سلسلہ میں باقاعدہ تقریبات منعقد کی جائیں گی ۔ ذرائع کے مطابق کارپوریٹ سیکٹر کی جانب سے بسنت کے تہوار کو بھرپور طریقے سے منانے کیلئے نہ صرف اپنے وسیع و عریض دفاتر کی چھتوں پر اہتمام کیا جائے گا بلکہ کئی کمپنیوں نے لاہور کے پوش علاقوں میں بلند و بالا عمارتیں بھی انتہائی مہنگے کرائے پر حاصل کی ہیں ۔ ذرائع کے مطابق مہمانوں کے لئے لاکھوں روپے کی پتنگوںاور ڈور کے انتظام کے ساتھ پر تکلف ناشتے ، ظہرانے اور عشائیے کیلئے کئی طرح کے پکوان تیار کرنے کے آرڈر دیدئیے گئے ہیں جبکہ خشک میوہ جات ، چائے ، قہوہ اور پھلوں کا بھی وسیع انتظام کیا گیا ہے ۔ مزید بتایا گیاہے کہ سائونڈ سسٹم والوں اور ڈھولچیوں کوبھی پیشگی بک کر لیا گیا ہے ۔
