لاہور (بیوروچیف) پنجاب پولیس نے محرم الحرام کے دوران امن و امان کے قیام اور مجالس و عزاداری جلوسوں کی حفاظت کے لیے جامع سیکیورٹی پلان تشکیل دے دیا ہے۔آئی جی پنجاب کاکہنا ہے کہ لاہورسمیت صوبہ بھرمیں مجالس اور عزاداری جلوسوں کو بھرپور سیکیورٹی فراہم کی جائے گی،عشرہ محرم الحرام کے دوران صوبے بھر میں 37 ہزار 868 مجالس منعقد ہوں گی،جبکہ 9 ہزار 412 عزاداری جلوس برآمد ہوں گے۔ ان اجتماعات کی سیکیورٹی کے لیے مجموعی طور پر ایک لاکھ 24 ہزار سے زائد پولیس افسران اور اہلکار فرائض انجام دیں گے۔ترجمان پنجاب پولیس کیمطابق 41 ہزار 200 اہلکار مجالس جبکہ 73 ہزار 400 سے زائد اہلکارعزاداری جلوسوں کی سیکیورٹی پرمامورہوں گے،اس کیعلاوہ جلوسوں کے روٹس،مجالس اورحساس مقامات کے اطراف 9 ہزار 500سے زائد اہلکار پٹرولنگ کے فرائض انجام دیں گے۔آئی جی پنجاب کاکہنا ہے کہ سی ٹی ڈی، اسپیشل برانچ، ٹریفک پولیس، ڈولفن فورس اور دیگر تمام فیلڈ فارمیشنز سیکیورٹی ڈیوٹی میں حصہ لیں گی، جبکہ سیف سٹیز اتھارٹی کے کیمروں کی مدد سے جلوسوں اور مجالس کی مسلسل نگرانی کی جائے گی۔انہوں نے واضح کیا کہ طے شدہ روٹس اورمقامات کے علاوہ کسی بھی جگہ عزاداری جلوس یا مجلس کی اجازت نہیں ہوگی۔ اسی طرح دفعہ 144 اور لائوڈ اسپیکر ایکٹ پر سختی سے عمل درآمد یقینی بنایا جائے گا۔آئی جی پنجاب کے مطابق 9 اور 10 محرم الحرام کو صوبے بھر میں ڈبل سواری پر پابندی عائد ہوگی، تاہم بزرگ شہریوں، خواتین اور قانون نافذ کرنے والے اداروں کے اہلکاروں کو اس پابندی سے استثنیٰ حاصل ہوگا۔
