اسلام آباد(بیوروچیف) حکومت نے پیٹرولیم مصنوعات کی قیمتوں کو ڈی ریگولیٹ کرنے کا فیصلہ کر لیا ہے، جس کے تحت آئل مارکیٹنگ کمپنیاں (او ایم سیز) مسابقتی نرخوں پر ایندھن فروخت کر سکیں گی تاکہ وہ اپنی مارکیٹ شیئر میں اضافہ کر سکیں، جبکہ قیمتوں کے استحکام کو یقینی بنانے کے لیے ایک حد مقرر کی جائے گی۔ ایندھن کی لاگت کو کم کرنے کے لیے، حکومت نے آئل ریفائنریز کو پیٹرولیم مصنوعات میں 5 فیصد تک ایتھنول شامل کرنے کی اجازت دینے کا بھی منصوبہ بنایا ہے۔ یہ اقدام پاکستان کے توانائی کے شعبے میں عدم فعالیت کو دور کرنے اور مقامی توانائی کی پیداوار میں سرمایہ کاری کو فروغ دینے کے لیے کیا جا رہا ہے۔سالانہ آئل اینڈ گیس کانفرنس میں گفتگو کرتے ہوئے وزیر پیٹرولیم مصدق ملک نے پاکستان میں آف شور آئل اور گیس کی تلاش میں ہونے والی نااہلیوں پر روشنی ڈالتے ہوئے کہا کہ گزشتہ 60سالوں میں صرف 18کنویں کھودے گئے ہیں، جبکہ پڑوسی ممالک نے کامیابی کے ساتھ آف شور ذخائر دریافت کیے ہیں۔ اس صورتحال کو مدنظر رکھتے ہوئے، پاکستان نے دس سال بعد 40آف شور اور 31آن شور بلاکس کی نیلامی کا اعلان کیا ہے تاکہ ملکی توانائی کی پیداوار کو بڑھایا جا سکے۔
