شوگر،سیمنٹ سیکٹر سے ٹیکس وصولی میں نمایاں اضافہ

اسلام آباد (بیورو چیف)ٹریک اینڈ ٹریس سسٹم کے نفاذ اور پیداوار کی ویڈیو لنک کے زریعے مانیٹرنگ کے بہتر نتائج سامنے آنا شروع ہوگئے، شوگر اور سیمنٹ سیکٹر سے ٹیکس وصولی میں 52ارب روپے سے زائد کا اضافہ گیا۔ ایف بی آر کے مطابق صرف شوگر سیکٹر میں نومبر سے ستمبر 2025کے دوران 144ارب روپے سے زیادہ ٹیکس وصول کیا گیا۔اہم کاروباری شعبوں میں ٹیکس چوری کی روک تھام کیلئے نصب ٹریک اینڈ ٹریس سسٹم اورپیداوار کی کیمروں کے ذریعے نگرانی کے حوصلہ افزا نتائج سامنے آنے لگے۔ ایف بی آر کے مطابق شوگراورسیمنٹ سیکٹر میں ٹیکس وصولی میں 52ارب روپے سے زیادہ اضافہ ریکارڈ کیا گیا ۔ صرف شوگر سیکٹر سے 11ماہ میں ٹیکس وصولی میں 35.2ارب روپے اضافہ ہوا۔دستاویز کے مطابق نومبر2024ء سے ستمبر 2025ء کے دوران شوگر سیکٹر سے 144.3ارب روپے ٹیکس وصول کیا گیا۔ یہ ریونیو سیلز ٹیکس اور فیڈرل ایکسائز ڈیوٹی کی مد میں جمع ہوا۔ گزشتہ سال اسی مدت میں چینی کے شعبے سے ٹیکس وصولی 109ارب روپے تھی۔ پرائس مانیٹرنگ سے 16.8ارب روپے اور پیداوار کی نگرانی سے 18.4ارب اضافی آمدن ہوئی۔ مالی سال 2026ء میں شوگر سیکٹر سے 75ارب اضافی ریونیو کا تخمینہ ہے۔دوسری جانب جون سے ستمبر 2025ء کے دوران سیمنٹ سیکٹر سے ٹیکس وصولی میں 17ارب روپے اضافہ ریکارڈ کیا گیا۔ گزشتہ سال کے 62.7ارب روپے کے مقابلے میں اس سال چار ماہ میں سیمنٹ سیکٹر سے 91.4ارب روپے ٹیکس وصول ہوا۔ ایف بی آر کے مطابق سیمنٹ سیکٹر سے سالانہ بنیاد پر 102ارب روپے ریونیو وصولی کا تخمینہ لگایا گیا ہے۔ ایف بی آر نوٹیفکیشن کے مطابق شوگر ملز کی ویڈیو اینالیٹکس کے ذریعے مانیٹرنگ لازمی قراردی گئی ہے۔شوگر ملز کو کرشنگ سیزن سے پہلے مانیٹرنگ آلات نصب کرنے کی ہدایت کی گئی ہے۔ اسی طرح سیمنٹ بیگز کی الیکٹرانک مانیٹرنگ کا حکم جاری کرتے ہوئے یکم نومبر سے بغیر ٹیکس اسٹیمپ اور یونیک آئی ڈی مارکنگ بیگز کی ترسیل ممنوع قرار دی گئی ہے۔