اسلام آباد کی50فیصد سے زائد ہائی رائز عمارتوں میں فائر سیفٹی آلات نامکمل

اسلام آباد (بیوروچیف)وفاقی دارالحکومت اسلام آباد کی 50 فیصد سے زائد عمارتوں میں فائرسیفٹی آلات مکمل نا ہونے کا انکشاف ہوا ہے۔ ذرائع کے مطابق کیپیٹل ڈیویلپمنٹ اتھارٹی نے اسلام آباد میں ہائی رائزبلڈنگز کاابتدائی سروے کیا جس میں 15میٹر سے اونچی عمارتوں کو ہائی رائز عمارتوں میں شمار کیا گیا جبکہ سروے میں یہ بات سامنے آئی کہ اسلام آباد میں 500سے زائد ہائی رائز عمارتیں موجود ہیں۔ذرائع نے بتایا کہ اسلام آباد کی50 فیصد سیزائد عمارتوں میں فائر سیفٹی آلات مکمل نہیں پائے گئے، سرکاری اور نجی عمارتوں میں بلڈنگ سیفٹی قوانین کی خلاف ورزی پائی گئی جبکہ ہائی رائزبلڈنگز میں فائرالارم، فائرایکسٹنگرئشر، فائر ہوزریل جیسے بنیادی آلات میں غفلت سامنے آئی۔ ذرائع کے مطابق ریڈزون کی متعدد ہائی رائز عمارتوں میں بھی فائرسیفٹی کے آلات مکمل نہیں، فیڈرل سیکرٹریٹ کے متعدد بلاکس میں فائرالارم اور آگ بجھانے کے دیگر آلات موجود نہیں جبکہ کراچی کمپنی میں واقع ہائی رائز عمارتوں میں فائر سیفٹی نہ ہونے کے برابر ہے۔ ذرائع کے مطابق ایف 11،ایف 10، جی 13، جی14،گولڑہ موڑ میں بھی عمارتوں میں فائرسیفٹی انتظامات غیرموثر ہے جبکہ صرف بلیوایریا کی چند ہائی رائز عمارتوں میں فائر سیفٹی تسلی بخش قرار دیا گیا ہے۔