پاکستان کمزور ٹیم انگلینڈ کو شکست ہوئی تو مایوسی ہو گی’ اسٹورٹ براڈ

لندن (سپورٹس نیوز) انگلینڈ کے سابق فاسٹ بولر اسٹورٹ براڈ کا کہنا ہے کہ پاکستان کمزور ٹیم ہے انگلینڈ کو ٹیسٹ سیریز میں وائٹ واش کرنا چاہیے۔انگلینڈ کے سابق فاسٹ بولر اسٹیون فن کے ساتھ حالیہ انٹرویو میں اسٹورٹ براڈ نے پاکستان کے موجودہ ٹیسٹ ٹیم کو کمزور قرار دیا اور کہا کہ انگلینڈ کی ناکامی پر مایوسی ہوگی۔انہوں نے کہا کہ پاکستان کمزور ٹیم ہے اس میں کوئی شک نہیں اگر انگلینڈ ٹیسٹ سیریز نہیں جیتتا تو یہ واقعی ہماری بہت بڑی ناکامی ہوگی۔واضح رہے کہ 2020 کے بعد انگلینڈ میں پاکستان کی پہلی ٹیسٹ سیریز ہے جب تین میچوں کی سیریز میں انگلینڈ نے پاکستان کے خلاف 0-1 سے کامیابی حاصل کی تھی جبکہ دو ٹیسٹ میچ ڈرا ہوئے تھے۔پاکستان کو انگلینڈ میں آخری ٹیسٹ سیریز میں فتح 1996 میں ملی تھی جب وسیم اکرم الیون نے تین میچوں کی سیریز میں 2-1 سے فتح حاصل کی تھی۔سابق کپتان عمران خان کی قیادت میں 1987 میں فتح اور جاوید میانداد کی قیادت میں 1992 میں سیریز جیتنے کے بعد پاکستان نے انگلینڈ میں یہ مسلسل تیسری ٹیسٹ سیریز جیتی تھی۔مجموعی طور پر انگلینڈ اور پاکستان ٹیسٹ کرکٹ میں 92 بار آمنے سامنے آچکے ہیں۔ انگلینڈ نے 30 ٹیسٹ میچ جیتے ہیں جبکہ پاکستان نے 23 میں فتح حاصل کی اور 39 ٹیسٹ ڈرا ہوئے ہیں۔