حکومت کا ساتھ محبت سے نہیں مجبوری کے ساتھ دیا جارہا ہے

لاہور(بیورو چیف)گورنر پنجاب سردار سلیم حیدر خان نے کہا کہ پاکستان پیپلز پارٹی ہی وہ جماعت ہے جو عوام کے مسائل کو سمجھتی ہے۔ پیپلز پارٹی نے ہمیشہ عوام کی فلاح و بہبود کو مقدم رکھا ہے۔ موجوددہ حکومت کا ساتھ محبت سے نہیں بلکہ مجبوری کے ساتھ دیا جارہا ہے۔ یہ بات انہوں نے اپنے دورہ سرگودھاکے دوران پارٹی عہدیداران ، کارکنان اور ورکروں سے خطاب کرتے ہوئے کہی۔سرگودھا پہنچنے پر پیپلز پارٹی کے سیکرٹری اطلاعات ندیم افضل چن،ڈویژنل صدرتسنیم احمد قریشی کے ہمراہ دیگرعہدیداران سمیت جیالوں کی بڑی تعداد نے گورنر پنجاب کا بھرپوراستقبال کیا ۔گورنر پنجاب سردار سلیم حیدر خان نے کہا کہ سرگودھا کے غیور عوام نے پیپلز پارٹی پر ہمیشہ اعتماد کا اظہارکیاہے۔انہوں نے کہا کہ پیپلز پارٹی سرگودھا کے کارکن اپنی بھرپور تیاری رکھیں اگلے وزیراعظم بلاول بھٹو ہوں گے۔گورنر پنجاب نے کہا کہ موجودہ حکومت کا ساتھ محبت سے نہیں مجبوری کے ساتھ دیا جارہا ہے۔انہوں نے کہا کہ پیپلزپارٹی کسان،تاجر،مزدور اور پسے ہوئے طبقے کی جماعت ہے۔گورنر پنجاب نے کہا کہ پیپلز پارٹی نے ہمیشہ ذاتی مفادات کی بجائے ملکی مفادات کو مقدم رکھا۔انہوں نے کہا کہ پیپلز پارٹی جب بھی اقتدار میں آئی تمام اداروں کو مضبوط اورخوشحال کیا اور ملازمتیں بھی فراہم کیں۔گورنر پنجاب نے مزید کہا کہ پیپلزپارٹی کے عہدیداران، کارکن اور جیالے باہر نکلیں اور بلاول بھٹو کا پیغام پہنچائیں۔ انہوں نے کہا کہ عوامی مسائل کا حل صرف پیپلزپارٹی کے پاس ہے۔گورنر پنجاب نے کہا کہ سرگودھا کے عوام پیپلزپارٹی کا ساتھ دیں ۔